திருமாங்கல்யம் எபிசோட் அப்டேட்: சாந்தி முகூர்த்தத்தைத் தடுக்க நடக்கும் சதி! ஸ்க்ரூ கழற்றப்பட்ட கட்டிலால் காத்திருக்கும் விபரீதம்!
திருமாங்கல்யம் எபிசோட்
Zee தமிழ் தொலைக்காட்சியில் திங்கள் முதல் வெள்ளி வரை இரவு 7:30 மணிக்கு ஒளிபரப்பாகி வரும் விறுவிறுப்பான தொடர் ‘திருமாங்கல்யம்’. இன்றைய எபிசோடில் மகா மற்றும் திருவின் சாந்தி முகூர்த்தத்திற்கான ஏற்பாடுகள் ஒருபுறம் நடக்க, அதைத் தடுத்து நிறுத்த இன்னொரு பக்கம் சதி நடக்கிறது. இதனால் அடுத்து என்ன நடக்கப் போகிறது என்ற எதிர்பார்ப்பு அதிகரித்துள்ளது.

ஊர்க்காரர்களின் கேலியால் கடுப்பான திரு!
மகா மற்றும் திருவின் சாந்தி முகூர்த்தத்திற்காக வீட்டில் தடபுடலாக ஏற்பாடுகள் நடக்கின்றன. அப்போது அங்கு வரும் ஊர்க்காரர்கள், "என்ன மாப்பிள்ளை, இரட்டைப் பிள்ளை வேணுமா? கட்டில் நல்லா இருக்கு, என்ஜாய் பண்ணுங்க" என்று திருவைக் கேலி செய்கின்றனர். இதனால் கடுப்பாகும் திரு, அறைக்குள் சென்று கோபத்தில் கத்துகிறான். என்ன நடந்தது என்று பதறிப் போய் கேட்கும் மகாவிடம், ஊர்க்காரர்கள் தன்னைக் கேலி செய்ததைச் சொல்லி வருத்தப்படுகிறான். இதற்கு லலிதா, "ஊர்ல இருக்கிற கொழுந்தனார், உறவினர்கள் இப்படித்தான் கேலி பண்ணுவாங்க. புதுசா கல்யாணம் ஆனவங்க வெட்கப்படுறதைப் பார்க்கிறது அவங்களுக்கு சந்தோஷம். இதையெல்லாம் பெருசா எடுத்துக்காதீங்க" என்று திருவைச் சமாதானப்படுத்துகிறார்.
கஜேந்திரனின் காரில் ஏற்பட்ட கோளாறு!
இதற்கிடையில், மோகனவல்லியும் பசுபதியும் தொடர்ந்து கஜேந்திரனுக்குப் போன் செய்து கொண்டே இருக்கிறார்கள். நீண்ட நேரத்திற்குப் பிறகு போனை எடுக்கும் கஜேந்திரனிடம், "இங்கே மகா வீட்டில் சாந்தி முகூர்த்தத்துக்கு எல்லா ஏற்பாடுகளும் நடக்குது, சீக்கிரம் வந்துடு" என்று மோகனவல்லி அவசரப்படுத்துகிறார். ஆனால், வேகமாகக் காரை ஓட்டி வந்ததால் கார் பாதியிலேயே பழுதாகி நின்றுவிட்டதாக கஜேந்திரன் கூறுகிறார். இதனால் அவர் வருவதற்கு தாமதமாகிறது.

கட்டிலில் ஸ்க்ரூ கழற்றி நடக்கும் சதி!
கஜேந்திரன் வருவதற்குத் தாமதமாகும் நிலையில், நேரத்தைக் கடத்துவதற்காக மோகன வல்லி யாருக்கும் தெரியாமல் ஸ்பேனரை எடுத்துக்கொண்டு வந்து, சாந்தி முகூர்த்தத்திற்காக அலங்கரிக்கப்பட்ட கட்டிலின் ஸ்க்ரூவைக் கழற்றிவிடுகிறார். அப்போது அங்கு வரும் பாட்டி, "என்ன செய்ற?" என்று கேட்க, அவர் பழங்களைச் சாப்பிட வந்ததாகச் சொல்லி சமாளிக்கிறார். இதற்கிடையில், கட்டிலுக்கு யாருடைய திருஷ்டியும் பட்டுவிடக் கூடாது என்று பாட்டி அதைச் சுற்றி உப்பைப் போட்டு திருஷ்டி கழிக்கிறார். ஆனால், கட்டிலில் நடந்த சதியை யாரும் கவனிக்கவில்லை.

பதற்றத்துடன் அறைக்குள் நுழையும் மகா!
லலிதா மகாவை அழகாகத் தயார் செய்து அழைத்து வருகிறார். வீட்டின் பின்பக்கம் கட்டிலில் அமர்ந்து போன் பார்த்துக் கொண்டிருக்கும் திருவை அழைத்து, இருவரையும் அறைக்குள் அனுப்பி வைக்கின்றனர். மகாவுக்காக அம்மாவாக இருந்து செய்ய வேண்டிய சடங்குகளைச் செய்ய முடியவில்லை என்ற வருத்தம் மோகனவல்லிக்கு ஒருபுறம் இருக்க, கையில் பால் செம்புடன் பதற்றமும் பயமும் கலந்த மனநிலையில் மகா அறைக்குள் நுழைகிறாள். ஸ்க்ரூ கழற்றப்பட்ட கட்டிலால் மகா மற்றும் திருவுக்கு என்ன விபரீதம் நடக்கப் போகிறது? கஜேந்திரன் வந்தால் என்ன நடக்கும் என்பது குறித்து அறிய திருமாங்கல்யம் சீரியலை உங்கள் Zee தமிழ் தொலைக்காட்சியில் காணத்தவறாதீர்கள்.