குடும்பத்தாரை பழிவாங்க சவப்பெட்டியுடன் வீடு சென்ற நபரால் பரபரப்பு

Report
104Shares

மீரிகம தலாகொலயாய பிரதேசத்திலுள்ள விடுதியொன்றின் உரிமையாளர் ஒருவர், இறப்பதற்கு முன்னதாகவே சவப்பெட்டியை கொள்வனவு செய்து வீட்டுக்கு எடுத்துச் சென்றுள்ள விசித்திர சம்பவம் இடம்பெற்றுள்ளது.

வீட்டில் எவரும் மரணிக்காத நிலையில் குறித்த நபர் அண்மையில் சவப்பெட்டி மற்றும் மரண வீடுகளில் பயன்படுத்தப்படும் ஏனைய அலங்காரப் பொருட்கள் அனைத்தையும் மலர்சாலையொன்றிலிருந்து கொள்வனவு செய்து வீட்டுக்கு எடுத்துச் சென்றுள்ளார்.

இது தொடர்பில் விசாரணை நடத்திய பொலிஸார் குறித்த நபரின் வீட்டை சோதனையிட்ட போது சவப்பெட்டி உள்ளிட்ட பொருட்களை கண்டு ஆச்சரியமடைந்துள்ளனர். மரணம் நிகழாத நிலையில் ஏன் இவ்வாறு சவப்பெட்டி கொள்வனவு செய்யப்பட்டது என பொலிஸார் கேள்வி எழுப்பியுள்ளனர்.

இதன் போது, குடும்பத்தினர் தம்மை ஒழுங்காக கவனிப்பதில்லை எனவும் அவர்களை அச்சுறுத்தும் நோக்கில் சவப்பெட்டி கொள்வனவு செய்தாகவும் குறித்த நபர் தெரிவித்துள்ளார்.

சவப்பெட்டியொன்றை வீட்டில் வைத்திருப்பது சட்ட விரோதமான செயல் கிடையாது என்ற போதிலும், சவப்பெட்டியை மீளவும் மலர்ச்சாலையில் ஒப்படைக்குமாறு பொலிஸார் அறிவுறுத்தல் வழங்கியுள்ளனர்.

இந்த சம்பவம் அந்த பகுதியில் அதிர்ச்சியில் ஆழ்த்தியுள்ளது

4484 total views